Knudaheio

Arne Garborg si sommarstove

Knudaheio stod ferdig i 1899. Frå då av reiste Arne Garborg hit for å skriva nesten kvart år til han døydde i 1924.

Ein stad for både arbeid og rekreasjon

Knudaheio er Arne Garborg si sommarstove ved Undheim på Jæren. Innreiing og inventar er autentisk, og dei fleste fotografia som er tatt av Arne i og utanfor huset, er utstilte inne. Det biografiske verket Knudaheibrev (1904) er skrive her, og har fått namn etter staden.

I 1924 donerte enka Hulda Garborg eigedomen til Time kommune. Både Arne og Hulda er hauglagde i hagen. I 2025 opna ei ny utstilling der du blir kjend med Knudaheio som gravstad, minnestad, skrivestad og turstad.

Knudaheio og Garborgheimen, barndomsheimen til Arne Garborg, har same opningstider. Løyst billett på ein av stadene gjeld òg på den andre same dagen, og du får rabatt på inngangsbilletten til Garborgsenteret når du viser billett frå Garborgheimen eller Knudaheio.